天與地

"人"這一種生物真的很獨特，我唔清楚係第二個星球有沒有，不過係地球一定無可能找到另一種類似的物種。 我們每一個人都曾經思考一些自由人類開始到現在為止都無辦法搞清楚的問題。 今次呢套戲由"食人"開始去勾起我們的反思，很血腥，但很真實。

我主要想說的，其實是戲中人物所說的每一種道理。 劇中有很多獨白，特別係葉梓恩(佘詩曼)做DJ，講野特別多。 其實所講的也不是什麼新穎的大道理，大部份都係啲阿媽係女人既道理 (太普通的道理，懶得打)。但就係呢啲文戲，吸引我用幾晚時間，係deadline之前，睇唒廿九集，而睇完呢廿九集，我發覺原來有時侯，我真係會唔記得阿媽係女人既...... 如果呢個世界所有既人都記得，我非常有信心呢個世界會比現在更好。

而身處絕地，食人就係咪可以體諒呢件事呢？ 本身就係無解。 正如戲中所言，我們可以體諒身處絕景的北極熊食小熊，為何對同樣身處絕地的人食人深惡痛絕？ 我想，無人能夠解釋，而且我唔認為係套戲既重點，就不去說了。

政府回水啦！！

剛剛電視又講愛民邨既愛心粥店。我還記得報紙剛剛開始報導佢派粥時，有很多奇奇怪怪的聲音，有人話店主想出名，有人說這是變相賣廣告，有異想天開的想到這是俾壓力領匯不能加佢租。同時又有人專登去食碗粥，食完放低一百蚊免找，有啲人亦擔心店主會俾人搵笨，一啲有錢阿婆會去呃粥食，呢個世界真係咩人都有。

不過，這都不是我想講的重點，愛心粥店令我想到政府派六千。當然個本錢來源不同，愛心粥店既錢係老闆自己的，而庫房那些是公家錢。政府派六千，有人讚，有人彈，仔細回想，對政府派六千的評語跟批評粥店的除去字眼不同，沒有太大分別。其實，無論政府係搏老感又好，抵不住民議壓力又好，有機會益咗有錢人都好，講到尾，庫房啲錢都唔係政府，係全香港人既，年年盈餘，都肥到襪都著唔到啦，點解唔回翻啲俾香港人呢？又唔係叫你回哂，回個少少，今年收翻黎既都夠派有剩啦！其實我係好反對用派呢個字，我覺得應該係叫回水，把收多既錢還返俾我地啫。

我唔係大富大貴，唔係含住金匙銀匙出世，但從小到大都未試過捱餓，未試過無瓦遮頭，touch-wood 講句，我生活還過得去。本人其實唔着緊這幾千蚊，唔係阿媽今天提我差不多到期啦，話我點解咁out仲未登記，我都未醒起要登記。但係我好彩啫，暫時都仲行緊運，有食有住，但唔係每個香港人都咁好彩架，真係有好多人日日愁住衣食住行架。一萬幾千對班官黎講，對班有錢佬黎講可能係＂於我如浮雲＂，但係對某啲香港人黎講，就係有冇飯開既問題。個班尊貴既立法會議員，高高在上既官，我地納稅人都唔肉赤，你地就唔使同我客氣，回水啦唔該!!!