三十幾歲人先至黎企街 之一

        六 月十六日下午彩虹街站，遇見一位鐘婆婆，佢話認得黃洋達，因為一次阿達去派米粉派營養飲品(佢話係沖水飲個種)。 同佢傾咗十幾分鐘，佢講開話好鍾意飲個隻營養飲品，試過去買，但係話搵唔到。 佢話有尐公公婆婆真係好慘，而家尐野又貴到死，平時想買尐好少少既野食都唔得，佢話如果再有機會派野俾公公婆婆，唔使派個尐米粉，尐錢用黎買哂個尐營養飲品黎派就得喎。 不過佢知道我地錢唔多，有心就得啦。

        尐宣傳單張用 Cuson 尐漫畫真係既幾好，我派既時侯一定把漫畫嗰面示人。 連尐反人力既都接咗黎睇，見到佢地發現原來有毓民阿達個樣時都幾搞笑。

        有個穿著恤衫西褲既阿叔叫我傳話，叫毓民唔好搞事，唔好拉布。 我就笑笑口同佢講都係為公義，跟住反問佢有乜唔好，佢就只係不斷重覆話唔好搞咁多野，唔好拉布阻住哂, 實在有乜唔好又講唔出。 我就繼續笑笑口問佢咁到低有乜唔好呢？ 嘿 ..........  佢講佢既，我問我既，大家都好似九唔撘八咁，無幾奈佢就走咗，不過佢走時唔記得手裡仍然拎住張傳單，唔知佢有冇一直拎住返屋企呢？

        仲有一個阿伯，睇佢都七十有餘，不過就真係估佢唔到仲係好氣好力。 唔知頭唔知路接咗我張傳單，翻轉張傳單一睇，見到毓民同阿達個樣，即刻打咗個突，跟住用力把傳單搾埋一"舊"，雙腿用力一撐，較剪腳離地，腰背用力，單手把那一"舊"傳單用力一掟，命中路過的垃圾手推車上的垃圾桶，乾淨利落！