求婚大作戰

　　剛開始睇頭幾集，覺得好熱血。點知再睇多幾集，先知道原來只不過係講一個失敗既男人點樣一路走來始終唔得，仲係要俾多十次機會返轉頭走多十次都係唔得。

　　我完全明白人類總係要犯同樣的錯，但係連開十次外掛都係唔得，就真係極品中的極品，沒有之一。

盡咗力就算

　　曾經睇過一本以魔武世界為背境的小說，書中有一個超屌的大配角，係一個由生化科技做出黎既基因改造人。 他過目不忘，處理事情精準，絕不犯錯，自身百毒不侵，亦絕不會生病。 可惜不會做錯，令創造力低下，連舉一反三也自不能，變成練武不成，學魔法也因為自身並非天然所生，出賣靈魂連地獄裹最卑下的魔鬼也不肯收。

　　不過，天無絕人之路，大配角還有一個優勢，比普通人多十倍的生命，所以無路可走的大配角，最終選擇以生命換取力量，最終成為天下無敵的人，而天下無敵 的代價，就是無時無刻所發出的每一拳，每一腳，都是以生命為代價發出，簡單啲講，每一杖都是有着與敵皆亡的心去打，而背後的原因，都只不過係為咗保護身邊 的人，保護從小看着長大的弟弟，小妹。

　　做人盡咗力就算，係我經常掛在口邊的一句說話，至於何為盡力，每一個人的成長環境，處世經歷都不盡相同，不能一慨而論。 所以，還是自己問自己吧，你真的想要得到嗎？ 為了得到你想要的，可以盡力到何種程度？

　　做人做事，盡力而為，何為盡力，自己問自己吧，無人答到你的。

　　只能再說一句：

　　盡咗力，就算吧。

令人火滾既 Vcity

　　現時座落於屯門的Vcity，前身其實係屯門最早既公共屋邨，旁邊仲有間何福堂小學。 當年我仲以為係因為要收地起西鐵站，所以非要拆咗全個新發邨連埋間小學不可。 點知原來個西鐵站係建起屯門河上面，完全唔關新發邨同埋間小學事。 但就係要拆哂成條邨黎起私人住宅加商場，而且嗰商場主要唔係服務屯門居民，係俾大陸人黎屯門買野，俾大陸人黎走水貨返大陸賣的。

　　而且，對比反啲舊相，起Vcity之前，從新墟係可以一眼望到去屯門市鎮公園既小山頭，起好之後全個景觀係完全被擋住，整個環境係變得幾咁劑逼，原本屯門與市區既最大分別就係樓與樓之間既密度疏落，雖然離市區較遠，交通係無咁方便，但係居住環境相對較好，空氣都比較清新，一個Vcity就破壞哂成個格局，舊時既新墟枱頭可以望到一個廣闊既藍天，現在枱頭就只係到一座座好似屏風咁擋係眼前既所謂隴門。

　　拆咗新發邨之後，將居民搬去較偏僻既富泰邨等新起公屋，但係政府就從來無唸過係原地起翻一條新既公共屋邨，乜唔係有接近三十萬人等上樓既咩？ 點解一定要用黎起私人屋宛？  唔通就係為咗方便大陸人黎抄樓走水貨？